咸豬手食譜上集【濃香雜菜湯】

咸豬手食譜上集【濃香雜菜湯】

有日閒逛超市，見到特價咸豬手，勁平！$35.8！

即時諗起老公的聲音，經常話叫我買嚟試整。但被我打發完事～

好啦，咁平，即管試試～

做法：

1。咸豬手放雪櫃普通層一天慢慢解凍後，洗淨，刮清豬毛。

2。豬手出水。預備一煲水，放1茶匙黑胡椒粒 (我用平時即磨黑胡椒的那一樽，打開蓋就是了)。水滾放豬手下去煲10分鐘。
3。餚湯底。預備湯煲，放1500ml水左右，水亦能僅僅足夠蓋到豬手 ，所以鍋子不用太大。(一隻豬手的味不會太濃，水太多，湯底就淡而無味了)。黑胡椒2茶匙、薑兩大片、月桂葉3-5片，用茶包袋包著，放進水中跟豬手同煲。水滾後轉小火煲30分鐘。
4。豬手取出，備用另一食譜。香料包取出不要。
5。預備雜菜：
-蕃茄 6-8個，切粒
-甘荀一條(小)，切粒
-西芹 2枝，切粒
-大紅尖椒 1隻，去籽切粒
-紅腰豆，雞心豆，適量 (預先浸透)
-薯仔，切粒，先浸水15分鐘，再放AF180炸10-15分鐘 (炸過的薯仔可防止煮溶)
-洋蔥1個，切粒，加欖油煎pan炒香
-椰菜1/4個，切小片/幼條
6。全部材料(除椰菜稍後落，防椰菜煮爛)掉進湯中煲慢火 煲1小時左右，至材料出味，豆亦煲淋。下椰菜再滾透。再調味，即可。
(因我是預備第二天吃，所以用了一個較長時間但會更出味的方法，先煲20-30分鐘，熄火焗過夜。第二天早上再煲滾，15分鐘，再焗。晚上預備晚餐前再煲滾，15分鐘左右，調味。關鍵是每隔一段時間煲滾，之後蓋著不要打開，不要亂動，存著真氣就不會變壞)
7。調味：自己調節啦～ 有茄膏，糖，鹽，少許香草碎，辣椒仔汁(有不吃辣的，吃時再加，加了好味很多)


※如果不喜歡做雜菜湯，可做蕃茄薯仔湯、青紅蘿蔔湯，或其他你喜歡的湯。
※如果連湯也不要的話，豬手不用出水了，直接做step3，豬手煲好出味就是了。