咕嚕鬼馬油條

【咕嚕鬼馬油條】

我不是原創者，好多年前已經見過人寫過，做過。。。

但我好鍾意咕嚕乜乜，咕嚕物物，全部都係我至愛。

呢個菜式，家中爆光率極高，因為太易又方便。而且Airfryer同油炸鬼係好朋友！完全可以快速地，無油地，炸至卜卜脆(製作油條的油不關我事另計XD)！再兜埋甜酸汁。。。wow~

曾經多次教過朋友們整，但偏偏無寫低。次次都寫一次，應該有自虐狂！

今次發帖，之後唔洗再罰自己不停打字啦！

材料:

油條一條切粒

墨魚膠二両 (約75g)

洋蔥，青椒，紅椒各半個切件

罐頭菠蘿兩片切粒

甜酸汁:

茄汁2湯匙

糖2湯匙

白醋2湯匙

粟粉1湯匙

罐頭菠蘿水/清水5湯匙

鹽少許

(記得自己試下味，甜酸度因人而異)

做法:

1)油條釀好墨魚膠。放入airfryer，180度約5分鐘，至油條脆身，墨魚膠熟，便可。

2)鑊加油燒熱，加洋蔥炒香，再加青椒，加少許鹽(我更會灑少許料理酒)，快炒片刻，加入菠蘿，加入油條，加甜酸汁，快兜，搞掂！所以材料掛上汁便可。

長氣話:

我嘅經驗係唔用新鮮油條會更脆。同食落無咁油。即係我會身痕買定油條，好似麵包咁，包好放冰格儲存。到要時取出，不用刻意解凍，切粒，釀墨魚膠。再放入airfryer炸脆。

如果無AF, 可以煎的。先煎熟墨魚膠一面，然後再煎脆油條。又或者用焗爐焗都得。